‘U PRIMU ‘I L’ANNU
E chista è l'arba da prima ‘i l’annu,
doppu na notti duci e senza ventu
briscìu stu cielu sanu e 'mbarsamàtu
tuttu pulitu, pari ca fu llustràtu
cu spazzuluni chi situli d’argentu.
‘U mari non si smovi,
sulu na 'ncrispatura e na buriedda,
‘u fumu ca nesci da muntagna
non è pi fari dannu
è un signali spiciali
l'auguriu ‘i tuttu l'annu.
Stu paisi è na binidiziòni,
na jurnata china ‘i primavera
puru si è sulu ‘a prima ‘i l’annu,
cu suli patruni 'ncuntrastàtu
di tutti li biddizzi du criatu.
‘U cielu e ‘u mari fannu na parìgghia
e non si senti ‘u sonu di na vuci,
chistu è ‘u mè paisi quannu si ruspìgghia
cu st’aria malandrina e sempri duci
'nta' stu giardinu ca è na maravigghia.
di FRANCO LA PICA
